Raporti: Viola Korça

Banorët e rrugës “Ahmet Korenica” në Gjilan tash e dy muaj po përballen me reduktime në furnizimin me ujë. Ata thonë se reduktimet po zgjarin me orë të tëra, e për këtë kanë njoftuar edhe kompaninë e ujësjellësit. Mirëpo, nga kjo e fundit kanë paralajmëruar se reduktimet do të vazhdojnë edhe më tej, dhe se me mungesë të furnizimit me ujë do të përballen edhe lagjet tjera të Komunës së Gjilanit, shkruan Kanal10.

Ka dy muaj që  Lumnije Selimi po detyrohet që në këtë mënyrë, të ruaj ujin e pijshëm.

Kjo për shkak të reduktimeve të shpeshta me të cilat po përballen banorët e rrugës “Ahmet Korenica” në Gjilan.

Selimi ka thënë se reduktimet në furnizimin me ujë po zgjasin me orë të tëra, andaj edhe po detyrohen që të gjejnë mënyra tjera për t’u furnizuar me të.

Selimi ka thënë se me reduktime në furnizimin me ujë po përballen vetëm banorët e kësaj lagje.

E për këtë, ajo ka deklaruar se kanë njoftuar edhe ujësjellësin.

Ndërkaq, nga KRU “Hidromorava” në Gjilan kanë thënë se kjo rrugë është në një pikë të lartë të qytetit, andaj edhe banorët po përballen me reduktime.

Nga kjo kompani janë shprehur se situata mund të përkeqësohet edhe më shumë në të ardhmen, dhe se me mungesë të furnizimit mund të përballen edhe lagjet tjera të qytetit.

“Aktualish nuk kemi ndonjë redukim të ujit për këtë pjesë të qytetit por për shkak se kjo rrugë është në pikë të lartë të qytetit ka edhe probleme te furnizimit me ujë. Situata mund të përkeqësohet edhe më shumë në të ardhmen dhe mungesa e ujit mund të ndihet edhe në pika të tjera të qytetit për shkak se niveli i ujit në akumulacionin e Përlepnicës po bie vazhdimisht dhe aktualisht është më shumë se 10 m nën nivelin maksimal”, thuhet në përgjigjen e KRU ‘Hidromorava” për Kanal10.

Përveç banorëve të lagjes “Ahmet Korenica” në Gjilan, edhe ata të lagjeve tjera disa herë janë ankuar për reduktime në furnizimin me ujë. /Gazeta10