Në  emisionin “Info 10”, Mazllum Baraliu, njohësi i rrethanave politike ka komentuar situatën e fundit së krijuari në vend pas sulmeve të ditës së djeshme në zyrën e KQZ-së në veri të Kosovës, raporton Gazeta10.

Baraliu, duke komentuar deklaratën e kryetarit të  KQZ-së  pas sulmeve që  ka thënë se “zgjedhjet me zor nuk mbahen, s’mund të  rrezikojmë  askënd”, Baraliu ka thënë se kryetari nuk ka përvojë në institucione të tilla sepse zgjedhjet janë  obligim kushtetues dhe organet e rendit duhet të  mundësojnë  mbajtjen e tyre.

“Në  radhë të  parë  ai zotëri, me respektin më  të  madh për të  nuk ka përvojë  të  madhe në  një  institucion të  tillë. E dyta nuk thuhet ashtu lehtë  sepse përfaqëson organet përkatëse dhe procesi zgjedhor është  obligim kushtetues. Zgjedhjet duhet bërë  përpjekje që  të  mbahen nuk po them në  asnjë  mënyrë  që  në  kushte anormale, të  rrezikshme të  sigurisë  të  mbahen. Por unë  mendoj institucionet përkatëse që  kemi tri kategori të  institucioneve të  sigurisë  që  e bëjnë sigurinë atje dhe këto kanë  këtë mision dhe përgjegjësi do duhej ta bënin. Nuk janë qytetarët atje të ngritur por grupet kriminale, që lehtë e shpejt veprojnë .”, ka thënë  Baraliu.

Gjatë ditës së djeshme zyrat e KQZ-së në veri të Mitrovicës janë sulmuar me bomba e granata dore për të  penguar zyrtarët e KQZ-së që ta bëjnë punën e tyre.

Sulmet kanë ardhur si shenjë revolte për mbajtjen e zgjedhjeve të jashtëzakonshme në katër komunat veriore të  Kosovës.

Këto sulme sipas Ministrit të Punëve të Brendshme, Xhelal Sveçla, i kanë  kryer “bandat kriminale të paguara nga Serbia”./Gazeta10