Gjermania i ka vërejtur deklaratat e presidentit të zgjedhur amerikan, Donald Trump, rreth Kanadasë dhe Grenlandës dhe i qëndron parimit ndërkombëtar se kufijtë nuk duhet të lëvizen me forcë, tha të mërkurën një zëdhënës qeveritar gjerman.

“Si gjithmonë, vlen parimi i respektueshëm i Kartës së Kombeve të Bashkuara dhe i Akordeve të Helsinkut, më saktësisht që kufijtë nuk duhet të lëvizen me forcë” – tha zëdhënësi qeveritar në një konferencë të rregullt për gazetarë, raporton agjencia e lajmeve “Reuters”.

Zëdhënësi refuzoi të komentonte, kur u pyet se sa seriozisht po i merrte Gjermania deklaratat e Trumpit.

Të martën, Trumpi refuzoi që t’i përjashtonte veprimet ushtarake ose ekonomike për ta siguruar marrjen e kontrollit të Kanalit të Panamasë dhe Grenlandës dhe gjithashtu e përmendi idenë e shndërrimit të Kanadasë në njërin nga shtetet e ShBA-së.

Në llogarinë e tij në rrjetin “Truth Social”, presidenti i zgjedhur amerikan ka publikuar dy harta ku Kanadaja paraqitet si pjesë e territorit të Shteteve të Bashkuara.

Ndaj deklaratave të Trumpit ka reaguar edhe Franca. Kryediplomati francez ka thënë se Bashkimi Evropian nuk do të tolerojë sulme ndaj kufijve të vet.