Inspektorati Policor i Kosovës (IPK) ka rekomanduar suspendimin e 11 zyrtarëve policorë lidhur me trajtimin e rasteve të raportuara nga e ndjera Arlinda Zekaj, e cila u vra në Pejë.

Sipas IPK-së, hetimet preliminare kanë evidentuar disa parregullsi në trajtimin e rastit nga Policia e Kosovës.

Ndër të gjeturat kryesore janë:

Nuk dokumentohet ekzekutimi i urdhrit mbrojtës të datës 7 shtator 2026.
Urdhri i dytë mbrojtës, i datës 16 tetor 2026, është ekzekutuar me gjashtë ditë vonesë, më 22 tetor, pas veprimeve zyrtare të IPK-së.
Nuk është trajtuar nga zinxhiri komandues një email i datës 23 tetor, përmes të cilit një hetues policor kishte kërkuar vlerësim të rastit dhe asistencë, duke propozuar edhe vizita të patrullave policore në shtëpinë e viktimës.
Janë evidentuar dyshime për dështime në zinxhirin komandues, në vlerësimin e nivelit të rrezikut dhe në ekzekutimin e vendimit të gjykatës.

Pas rekomandimit të IPK-së, Policia e Kosovës ka suspenduar 11 zyrtarë policorë, përfshirë ushtruesin e detyrës së drejtorit rajonal në Pejë, shefin e Hetimeve Rajonale, komandantin dhe zëvendëskomandantin e Stacionit Policor në Pejë, zyrtarë të tjerë udhëheqës dhe katër hetues policorë.

IPK ka bërë të ditur se veprimet hetimore po zhvillohen me autorizimin e Prokurorisë së Shtetit, me qëllim të shqyrtimit të plotë të veprimeve dhe procedurave të ndjekura nga zyrtarët policorë.