Policia e Kosovës ka shoqëruar dhjetë persona për në stacionin e Policisë së Kosovës në Prishtinë, pasi që të njëjtit kanë shqetësuar qytetarët në sheshin “Zahir Pajaziti” në kryeqytet.

Këta persona sonte kanë parakaluar nëpër sheshet e Prishtinës të maskuar, me ç’rast kanë shkaktuar shqetësim tek qytetarët që ishin duke kaluar nëpër qytet.

Nga policia kanë bërë të ditur se personat e dyshuar janë shoqëruar në stacion dhe ndaj tyre janë shqiptuar gjoba.

“Sot rreth orës 18:00, në shesh në Prishtinë policia ka ndaluar dhe shoqëruar në stacion policor 10 persona. Personat në fjalë të cilët me vete kishin dy qenë, kanë parakaluar në sheshet e Prishtinës të maskuar duke ju shkaktuar shqetësim qytetarëve që ishin prezent në atë zonë”, kanë thënë nga policia.

Sipas policisë pas intervistimit, në koordinim me Prokurorin e Shtetit, dhjetë të dyshuarit janë liruar dhe ndaj tyre janë shqiptuar gjoba për prishje të rendit dhe qetësisë publike. /Rtk