Presidenca e Kosovës, ka njoftuar se Donika Kadaj Bujupi është emëruar këshilltare e presidentes Vjosa Osmani, raporton Gazeta10.

Në njoftimin e tyre thuhet se presidentja i ka uruar mirëseardhje Kadaj Bujupit duke thënë se përvoja e saj do të kontribuojë edhe më shumë në Kabinetin e Presidentes.

“Presidentja e Republikës së Kosovës, Vjosa Osmani, ka emëruar sot znj. Donika Kadaj Bujupi, këshilltare në Kabinetin e Presidentes. Presidentja Osmani, i ka uruar mirëseardhje znj. Kadaj Bujupi, dhe ka theksuar se përvoja e saj e gjatë profesionale do të kontribuojë edhe më shumë në arritjen e objektivave të Kabinetit të Presidentes dhe avancimit të mëtutjeshëm të punës së Presidencë.”, thuhet në njoftim.

Tutje është bërë edhe prezantimi i ish-deputetes Donika Kadaj Bujupit.

“Znj. Kadaj Bujupi ka përvojë të gjatë parlamentare, si deputete e Kuvendit të Republikës së Kosovës në pesë mandate, ku ka shërbyer në komisione të ndryshme, përfshirë atë të politikës së jashtme, integrimit evropian, arsimit. Përgjatë përvojës së saj profesionale, znj. Kadaj Bujupi ka punuar në organizata të ndryshme vendore dhe ndërkombëtare, ndërsa është angazhuar vazhdimisht në tema të të drejtave të njeriut, barazisë gjinore, ambientit dhe arsimit. Në Presidencë, znj. Kadaj Bujupi do të angazhohet, ndër të tjera, në fushën e komunikimit publik dhe marrëdhënieve ndërkombëtare.”, përfundon njoftimi./Gazeta10