Boksierja kosovare Donjeta Sadiku, ka arritur një fitore të rëndësishme dhe bindëse në kuadër të Turneut Ndërkombëtar të Boksit Strandja, që po mbahet në Sofje të Bullgarisë, duke mposhtur me vendim unanim 5:0 boksieren nga Republika Çeke, Barbora Maxova, në kategorinë 60 kilogramë.

Ndeshja, e zhvilluar sot, më 25 shkurt në Sofje, tregoi epërsinë e plotë të Sadikut gjatë të gjitha tri raundeve. Gjyqtarët nga vende të ndryshme i dhanë avantazh të qartë boksieres kosovare, me rezultate të përgjithshme 30:26, 30:26, 29:27, 30:26 dhe 30:27, duke konfirmuar dominimin e saj në ring.

Sadiku kontrolloi garën e saj me teknikë të pastër, lëvizje të shpejta dhe goditje të sakta, kështu duke mos i lënë hapësirë kundërshtares së saj. Fitorja me rezultat maksimal 5:0 në këtë turne prestigjioz ndërkombëtar dëshmoi formën e lartë dhe përgatitjen serioze të saj.

Me këtë triumf, Sadiku vazhdon rrugëtimin e saj drejt medaljes së artë në “Strandja 2026”, duke rritur shpresat dhe krenarinë për Kosova në një nga turnetë më prestigjioze të boksit amator në botë.