Analistja politike, Shqipe Pantina ka reaguar ndaj komentatorit politik, Xhavit Drenorit, i cili në debat e sipër sa diskutohej për Listën Serbe ia rikujtoi Pantinës se ka hedhur gaz lotsjellës në Kuvendin e Kosovës asokohe kur ka qenë në Lëvizjen Vetëvendosje.

Pantina ka thënë se deklarimet e tilla nxisin qytetarët që të drejtojnë sharje e ofendime në adresën e saj.

“Mas ktyne supozimeve që ju po e mbroni Listën Serbe del një ushtri e tanë në facebook që më quan ‘e pagume prej Vuçiqit’, ‘tradhtare’ dhe anej, knej. Ti, Drenor dy herë me permende emrin dhe the se kam gju gaz lotsjellës. Është e vërtetë, por jam mësu me sharje e fyerje”, ka thënë Pantina.

E emocionuar, Pantina ka thënë se është e rëndë për prindërit e saj që e kanë një djalë dëshmor që të dëgjojnë akuza se “fëmija i tyre është argat i Vuçiqit”.

“Jam mësu me ofendime të pabaza. Ama i kam dy prind të cilët nuk janë veç prindt e mi. Janë prindt e një djali që ka vdek për këtë vend”, ka thënë Pantina në “Politiko” me Kushtrim Sadikun. /Gazeta10/