Bashkimi Evropian nuk mund të vazhdojë negociatat e anëtarësimit me Serbinë nëse Beogradi nuk respekton sanksionet e BE-së kundër Rusisë, njoftuan socialdemokratët, grupi i dytë parlamentar më i madh në Parlamentin Evropian.

Kështu e komentoi ky grup nënshkrimin e planit konsultativ nga Ministritë e Jashtme të Serbisë dhe Rusisë në Nju Jork.

“Shumë zhgënjyese nga një vend që aspiron të anëtarësohet në BE,” shkroi deputeti socialdemokrat nga Kroacia Tonino Picula në rrjetet sociale.

Krerët e diplomacisë së Rusisë, Sergej Lavrov dhe Serbisë, Nikola Selakoviq, nënshkruan të premten në Nju Jork Planin e Konsultimit të Ministrive të Punëve të Jashtme të dy vendeve për dy vjetët e ardhshëm.

Kjo u dënua nga shumë zyrtarë evropianë dhe ambasadori amerikan Christopher Hill në Serbi, tha se SHBA pret një shpjegim nga Beogradi për marrëveshjen me Moskën.