Federata Shqiptare e Futbollit ka ndërmarrë hapat ligjor duke paditur ish-futbollistin kosovar, Shefki Kuqin.

Sipas FSHF-së, Kuqi ka gënjyer, pasi kishte thënë në një deklaratë publike se në fundvitet 90-ta i janë kërkuar para për tu pajisur me pasaportë shqiptare dhe përfaqësuar Kombëtaren e Shqipërisë.

“Padia e FSHF ndaj Shefki Kuqi është pranuar nga Gjykata Themelore në Prishtinë dhe është regjistruar me numër C.nr. 119/22”, shkruan FSHF.

Ndryshe, Kuqi përfaqësoi kombëtaren e Finlandës me të cilët numëron 63 ndeshje dhe shtatë gola.

Por, në një intervistë në muajin dhjetor, ish-futbollisti nga Kosova kishte thënë se dëshira e tij ishte ta përfaqësonte Shqipërinë, por i kërkuan para për t’ia plotësuar këtë dëshirë.

“Dëshira ime para se të zgjidhja Finlandën ishte, unë kam tentuar dhe kam dashur të shkojë në Kombëtaren e Shqipërisë. Atëherë është dashur të japësh lek për të luajtur në kombëtaren e tyre, kështu që…”, kishte thënë Kuqi.

Sipas tij paratë i janë kërkuar nga ana e “federatës”, ndërsa shuma totale për të cilën flitej, shkonte në rreth “100-200 mijë euro”.

Kujtojmë që Kuqi kishte luajtur për klube të ndryshme evropiane, dersia shumicën e karrierës së tij e kaloi në ekipet angleze.

Fulham, Newcastle, Crystal Palace, Ipswich, Swansea, etj., ishin disa nga klubet në të cilat luajti ish-futbollisti i lindur në Vushtrri.