Trajneri i Paris Saint-Germain, Christophe Galtier, ka konfirmuar se klubi do nënshkruajë edhe me një sulmues tjetër para përfundimit të merkatos verore, ndërsa nga klubi parisien pritet të largohen Mauro Icardi dhe Keylor Navas, shkruan Gazeta10.

PSG deri më tani në këtë afat kalimtar përpos së e ka emëruar shef të shtabit teknik Galtierin, ka transferuar edhe futbollistët si Vitinha, Mukiele, Eketike dhe Renato Sanches, por duket se në ditët në vazhdim kjo skuadër do të përforcohet në fazën ofanzive.

Tekniku francez, ka deklaruar se klubi do të nënshkruajë me një sulmues të ri dhe ka thënë se poashtu gjatë këtyre ditëve do të ketë edhe largime nga kampioni në fuqi i Francës.

“Do të nënshkruajmë me një sulmues të ri, pasi po kërkojmë të gjejmë një zgjidhje për Mauro Icardin dhe gjithashtu Kalimuendo do të bashkohet me Rennes. Sa i përket Keylor Navas, ne e rrespektojmë atë. Ai nuk dëshiron të jetë portieri i dytë, është normale. Më kanë thënë se tani ka klube të interesuara”, deklaroi Galtier. /Gazeta10/