Raporti: Kujtesa Delija

Përgjatë bukurive natyrore të bjeshkëve të Deçanit, mes freskisë dhe qetësisë buron uji i thartë i Gushavcit.

100 vjeçarja nga Strellci i Deçanit këtë vend e konsideron si të shenjtë, derisa kujton ende momente nga fëmijëria e saj pranë këtij burimi.

“Këto 100 vitet e mia i mbaj mend më së miri prej këtij vendi ku jemi larë e shumë herë fshehtë jemi detyru me ardh këtu, ky  është vend i bekuar e unë sot e kam sjellë nipin me u la”, shprehet Mahmudemaj për Kanal10.

Ashtu siç është krijuar nga natyra, tash e disa shekuj për ujin e këtij burimi thuhet se shëron disa sëmundje siç janë sëmundjet e eshtrave, hemorragji të lekurës, njolla në fytyrë etj.

Ndërkaq edhe mërgimtari, Rexhë Pajaziti thotë se në Gushavc ka ardhur për një arsye, për t`u shëruar nga sëmundjet që vuan.

“Ky është viti i parë që kam dëgjuar për këtë vend, kam katër ditë që po vijë sepse po ankoj prej këmbëve e kam dëgjuar që është ilaq për eshtra. Madje po e ndjej vetëm shumë më mirë e shumë më lehtë, tash e tutje këtu do të jem më shpesh”, tha 75 vjeçari nga Istogu.

Bukuritë e bjeshkëve të Deçanit tash e disa kohë janë shndërruar në një atraksion për shumë turistë vendor dhe jo vetëm./Kanal10