Kushtrim Gashi është larguar nga Ballkani për t’u transferuar tek Prishtina, aty ku do të ribashkohet me ish-trajnerin e tij te skuadra nga Suhareka, Ismet Munishi.

Gashi u largua nga kampioni i Kosovës pas problemeve që kishte me trajnerin, Ilir Daja para ndeshjeve kualifikuese për në Ligën e Kampionëve kundër skuadrës së Zalgirisit.

Gashi ka folur për herë të parë si futbollist i skuadrës nga kryeqyteti. Ai për portalin më të ri në vend, gazetën10 tregon për ndarjen me ish-skuadrën e tij.

“Kam pasur probleme me trajnerin dhe jam larguar nga Ballkani. Sa i përket ndarjes kam biseduar vetëm me presidentin e klubit dhe drejtorin të cilët i falenderoj për mirëkuptimin që me lejuan të largohem si futbollist i lirë. Me trajnerin nuk kam pasur fare komunikim.Ballkanit i dëshiroj shumë suksese në garat evropiane dhe në kampionat”, tha fillimisht Gashi.

Por cila është arsyeja për të cilin ai është bashkuar menjëherë me Prishtinën?

“Padyshim që arsyeja është shumë e thjeshtë. Prishtina është skuadra më e madhe në Kosovë ka pasur probleme mirëpo tanimë janë tejkaluar” është përgjigjur ai.

Mesfushori tutje deklaroi se ai është pritur mjaftë mirë te Prishtina dhe që synimi padyshim është titulli kampion.

“Kam pasur pritje të ngrohtë nga trajneri Ismet Munishi dhe lojtarët. Me shumicën prej tyre kam luajtur më parë në skuadra të njëjta dhe i njoh pothuajse të gjithë. Synimi? Padyshim që titulli kampion. Prishtina gjithmonë duhet ta synojë atë dhe për atë kam ardhur këtu”, shtoi Gashi.

Gashi ka nisur stërvitjet me skuadrën e Prishtinës ditë më parë derisa mësohet se ai nuk do të ketë të drejtë të paraqitet me Prishtinën në katër ndeshjet kundër ish-skuadrës së tij Ballkanit./Gazeta10/