Forcat izraelite raportohet se kanë kryer sulme të reja në jug të Libanit, pavarësisht kritikave të ripërtërira nga presidenti amerikan Donald Trump ndaj veprimeve të Izraelit në këtë vend.

Të mërkurën, avionët luftarakë izraelitë goditën zonën e Nabatieh al-Fawqa dhe periferinë e fshatit fqinj Kfar Tebnit, njoftoi NNA, agjencia shtetërore e lajmeve e Libanit. Ushtria izraelite ende nuk ka komentuar mbi këto sulme, por më herët ka deklaruar se po synon Hezbollahun, grupin e armatosur të mbështetur nga Irani.

Teksti i marrëveshjes mes SHBA-së dhe Iranit për t’i dhënë fund luftës nuk është publikuar ende, por ndërmjetësi Pakistani ka bërë të ditur se ajo përfshin edhe Libanin.

Të martën, Trump deklaroi se kryeministri izraelit Benjamin Netanyahu duhet të jetë “më i përgjegjshëm në raport me Libanin”.

Duke folur në samitin e G7 në Francë, ai tha gjithashtu se Izraeli ka luftuar kundër Hezbollahut për “shumë gjatë” dhe se “po vriten shumë njerëz.”

Si Izraeli ashtu edhe Hezbollahu kanë kryer sulme kundër njëri-tjetrit që kur marrëveshja SHBA-Iran u shpall të dielën në mbrëmje.

Më herët atë ditë, një sulm ajror izraelit mbi Bejrut, si kundërpërgjigje ndaj një sulmi me raketa ndërkufitare nga Hezbollahu, kishte vënë nën presion përpjekjet për finalizimin e marrëveshjes.

Trump u tha liderëve të G7 se ai ka një “marrëdhënie shumë të mirë” me Netanyahun, por shtoi se “nuk më pëlqeu që ai kreu atë sulm… ishte i tepruar.”