Deputeti shqiptar në Kuvendin e Serbisë, Shaip Kamberi, ka kritikuar të dërguarin special të BE-së për dialogun Kosovë-Serbi, Miroslav Lajçak se teksa takohet me serbët e Kosovës, ndërkohë, që nuk i përgjigjet pozitivisht ftesës së tij për takim që si deputet përfaqëson rreth 100 mijë shqiptarë që jetojnë në Serbi.

Kamberi ka thënë se ka kërkuar takim me Lajçakun për të diskutuar rreth diskriminimit të shqiptarëve në Serbi e pasivizimit të adresave, por thotë se nuk ka marrë asnjë përgjigje pozitive nga Lajçaku dhe ekipi i tij.

“Derisa Lajçak takohet me serbët nga Kosova, Unë, si deputet që përfaqësoj rreth 100 mijë shqiptarë në Serbi, kam kërkuar vazhdimisht një takim për të diskutuar çështjet e diskriminimit, nga shpërbërja e deri te pasivizimi i shqiptarëve në Serbi. Fatkeqësisht, asnjë përgjigje pozitive nga Lajçaku apo ekipi i tij”, ka shkruar Kamberi.