Presidenti amerikan, Donald Trump, ka deklaruar sot se Shtetet e Bashkuara do të “marrin” ishullin Kharg të Iranit dhe infrastrukturën tjetër të naftës iraniane.

Në këtë deklaratë, Trump tha edhe se do ta godasin Iranin shumë fort sonte”.

“Në një moment në të ardhmen jo shumë të largët, ne do të marrim ishullin Kharg dhe pika të tjera të infrastrukturës së naftës, dhe do të marrim kontroll të plotë të tregjeve të tyre të naftës dhe gazit”, shkroi Trump në Truth Social.

Por çfarë është ishulli Kharg dhe pse Trump dëshiron ta “marrë”?

Ky ishull është një burim jetik ekonomik për Teheranin, pasi zakonisht trajton rreth 90% të eksporteve të naftës bruto të vendit, raporton CNN.

Ishulli, rreth një e treta e madhësisë së Manhatanit, është përshkruar nga zyrtarë amerikanë si “nyja qendrore e gjithë furnizimit me naftë të Iranit”. Molo të gjata shtrihen në ujërat përreth, të cilat janë mjaft të thella për të akomoduar anije gjigante transportuese nafte, duke e bërë ishullin një pikë kritike për shpërndarjen e naftës.

Zyrtarë të Shtëpisë së Bardhë besojnë se marrja e ishullit do ta “falimentonte plotësisht” Gardën Revolucionare Islamike të Iranit, raportoi CNN më herët këtë vit.

Trump më parë kishte thënë se Kharg nuk ishte “shumë lart në listë”. Por që në vitin 1988, dekada para se të zgjidhej president, ai ka folur për marrjen e ishullit.

“Nëse qëllohet një plumb kundër njërit prej njerëzve ose anijeve tona, unë do të godisja rëndë ishullin Kharg. Do të hyja dhe do ta merrja,” i tha ai The Guardian në një intervistë në atë kohë.