Këshilli i Ambasadorëve Shqiptarë ka përshëndetur takimet e sotme në Bruksel mes Sekretarit të Përgjithshëm të NATO-s, Jens Stoltenberg dhe Albin Kurtit e Aleksandar Vuçiqit. 

Teksa, ka shprehur keqardhje për moszbatim të marrëveshjeve të arritura. 

“KASh shpreh keqardhjen që marrëveshjet e arritura deri tani ndërmjet dy vendeve nuk kanë gjetur zbatimin e premtuar, duke ushqyer rritjen e mosbesimit dhe të tensioneve përkundër qëllimit të këtij dialogu”, ka shkruar KASh. 

Ky Këshill e ka theksuar rëndësinë e rivitalizimit të dialogut, si dhe angazhimin e të dyja palëve për një marrëveshje përfundimtare. 

“KASh thekson rëndësinë që ka rivitalizimi i dialogut që po zhvillohet me mbështetjen e BE-së dhe ShBA-së dhe veçanërisht angazhimi vullnetmirë i të dy palëve për një marrëveshje përfundimtare që do t’i jepte fund agonisë së pasigurisë e do të nxiste përparimin e të 2 vendeve dhe Ballkanit Perëndimor drejt Bashkimit Evropian”./Gazeta10