Një aksident trafiku me fatalitet ka ndodhur në rrugën Ferizaj-Shtime ku si pasojë të vdekur kanë mbetur 4 persona të moshës rinore, raporton Gazeta10.
Ndërsa, dy persona të tjerë të lënduar tani aktualisht janë duke e marrë trajtimin në QKUK, ku ndodhet edhe gazetarja e Kanal10, Aferdita Lukaj e cila ka thënë se gruaja shtatzënë dhe burri i saj janë më mirë.
“Katër persona kanë vdekur në një aksident që ka ndodhur në magjistralen Ferizaj Shtime. Poashtu dy persona janë lënduar në këtë aksident që tani po e marrin trajtimin në QKUK. Pra bëhet fjalë për një çift, ku gruaja është në gjendje më të rëndë, bëhet fjalë për një grua shtatzënë 27-vjecare. Më herët biseduam me familjarët e çiftit të cilët na informuan se mjekët e kanë informuar gruan se foshnja është mirë dhe tani ajo është në sallë të operimit, pasi që gruaja ka thyer këmbën ndërsa burri ka thyer krahun.”, ka thënë Lukaj.
Në këtë aksident kanë qenë të përfshira 3 vetura, ku në njërën nga to nuk pati të lënduar.
Aksidentin më parë e kishte konfirmuar për Gazeta10 edhe zëdhënësi i Policisë së Kosovës për rajonin e Ferizajt, Kanun Veseli.
“Rreth orës 19:15 Policia Rajonale e Ferizajt ka pranuar një informacion se në aksin rrugor Ferizaj -Shtime, në hyrje të Shtimes, ka ndodhur një aksident komunikacioni ku janë përfshirë tri automjete të udhëtarëve, vetura me targa vendore. Si pasojë e këtij askidenti, 4 persona kanë humbur jetën, vdekja e të cilëve është konfirmuar nga mjekët në vendin e ngjarjes. Ekipe të Emërgjencave janë në vendin e ngjarjes Njësia e Hetimeve të Komunikacionit Rrugor ka nisur hetimet”, tha Veseli./Gazetën10.