Kryetari i Partisë Demokratike të Kosovës, Memli Krasniqi, ka falënderuar Shqiprinë për Rezolutën të cilën e kanë dërguar në Këshillin e Europës, teksa ka ftuar institucionet e Kosovës ta ndjekin të njejtën rrugë, raporton Gazeta10.

Krasniqi ka thënë se institucionet e Kosovës duhet të fillojnë me lobim tek aleatët ndërkombëtar sepse e vërteta në radhë të parë i duhet Kosovës.

Tutje, Krasniqi ka thënë se UÇK ka pasur kauzë dhe mision lirinë e popullit dhe se asgjë s’mund ta zhbëj këtë të vërtetë.

Këtu keni postimin e plotë:

“Jam jashtëzakonisht mirënjohës ndaj shtetit shqiptar, që tashmë edhe zyrtarisht është vënë në mbrojtje të së vërtetës së luftës së pastër të Ushtrisë Çlirimtare të Kosovës, për ta çliruar këtë të vërtetë nga pretendimet e fabrikuara e të pabaza kundër lirisë dhe pavarësisë sonë.

Adresimi i Shqipërisë në Asamblenë Parlamentare të Këshillit të Evropës, me kërkesë për të rishikuar rezolutën e KE-së që merr për bazë raportin e Dick Martyt, është hapi i parë në rrugën tonë të përbashkët drejt konfirmimit të së vërtetës, të drejtës e drejtësisë.

Ftoj institucionet e Kosovës që t’i përgjigjen këtij rrugëtimi dhe të angazhohen në lobimin e miqve tanë ndërkombëtarë, veçanërisht në Këshillin e Evropës, duke trokitur në çdo derë ku është e nevojshme, sepse e vërteta i duhet në radhë të parë shtetit të Kosovës, për ta hequr përgjithmonë perden e imazhit të rëndë që ka hedhur mbi UÇK-në, raporti fantom i Dick Martyt.

Ushtria Çlirimtare e Kosovës ka pasur kauzë të qartë dhe mision të shenjtë: lirinë e popullit të Kosovës. Asgjë nuk e zhbën e s’do të mund ta zhbëjë të vërtetën e kësaj kauze dhe këtij misioni. Mirënjohës dhe tejet falënderues ndaj Kryeministrit Rama për angazhimin e tij konkret në këtë rrugëtim për të vërtetën dhe të drejtën tone”, ka shkruar Krasniqi në llogarinë e tij në Facebook. / Gazeta10