Kryetari i Partisë Demokratike të Kosovës, Memli Krasniqi, ka kujtuar në përvjetorin e vdekjes së tij të 555-të, Gjergj Kastriot Skënderbeun, raporton Gazeta10.

Ai ka thënë se Skënderbeu është personaliteti i parë dhe më i rëndësishëm i kombit.

Më tej, ai ka thënë se Skënderbeu kujtohet me nder dhe krenari si udhërrëfyes, strateg dhe shembull të unifikimit.

“Lavdi të përjetshme simbolit të nderit, identitetit dhe partiotizmit shqiptar”, ka shkruar ndër të tjera Krasniqi.

Këtu keni postimin e plotë:

“Përgjatë një jete në mes stuhive të kohës, Gjergj Kastrioti Skënderbeu u shndërrua në simbol të forcës, vendosmërisë dhe rezistencës shqiptare.

Përjetësisht, në zemrën e secilit shqiptar atdhedashës, Skënderbeu është skalitur si themeluesi, heroi, personaliteti i parë dhe më i rëndësishëm i kombit.

Sot, në 555 vjetorin e kalimit të tij në amshim, me nder dhe krenari kujtojmë trashëgiminë historike të udhërrëfyesit, strategut dhe shembullit të parë të unifikimit mbarëshqiptarë në përpjekjet për liri e mëvetësi.

Lavdi të përjetshme simbolit të nderit, identitetit dhe patriotizmit shqiptar”, ka shkruar Krasniqi në llogarinë e tij në Facebook. / Gazeta10