Kryeministri i Kosovës, Albin Kurti, duke komentuar zhvillimet e fundit ka thënë se barrikadat e kriminelëve në veri duhet të hiqen menjëherë, raporton Gazeta10.

Ai ka thënë se ka disa ditë që Serbia po e kërëcënon Kosovën si dhe krerët e saj po bëjnë thirrje që ta kthejnë ushtrinë në Kosovë.

Më tej, Kurti ka thënë se secili mosdënim i Perëndimit ndaj veprimeve të Serbisë vetëm se do ta motivojë atë.

Tutje, Kurti ka thënë se ministri i brendshëm i Kosovës është në kontakt me komandatin e KFOR-it.

Më tej ai ka thënë se kriminelët dhe rusofilët do të dështojnë në Kosovë.

Këtu keni statusin e plotë:

“Ka disa ditë që Serbia kërcënon Kosovën me agresion. Presidenti dhe kryeministrja e Serbisë bëjnë thirrje për kthimin e ushtrisë serbe në Kosovë. Një mijë ushtarë thonë, duke u thirrur në Rezolutën 1244 (1999) të KS të OKB-së.

Ata duan një kthim të dyfishtë. E para, kthim në kohën e Milosheviqit dhe të luftës. Së dyti, që çështja e Kosovës të kthehet në OKB dhe sa më larg BE-së.

Si reagim ndaj propozimit të BE-së të mbështetur nga Franca e Gjermania (dhe ShBA-të), duan kthim te KS i OKB-së ku ndodhet vetoja e Rusisë (dhe Kinës).

Kosova është shtet evropian, demokratik dhe pro-amerikan. Me këtë udhëheqje që ka, Serbia është autokratike, pro-aziatike dhe luftënxitëse. Ne nuk duam konflikt, ne duam paqe dhe progres, por agresionit do t’i përgjigjemi me gjithë fuqinë që kemi.

Tash që as targat e automjeteve dhe as datën e zgjedhjeve nuk mund t’i përdorin si pretekst, strukturat ilegale të Serbisë të shndërruara në banda kriminale u zbuluan në etjen e tyre për zjarr e gjak.

Çdo mosdënim i vendosur nga ana e BE-së dhe ShBA-ve i kësaj dhune të orkestruar do të inkurajojë Beogradin zyrtar për më shumë nxitje për destabilizim të Kosovës.

Ministri i brendshëm Sveçla është në kontakt me Komandantin e KFOR-it Ristuccia. Barrikadat e kriminelëve me maska në veri duhet të hiqen menjëherë. Kosova është vend i qytetarëve të lirë e punëtorë, pa dallim etnie e feje, gjinie e moshe. Kriminelët dhe rusofilët do të dështojnë. Republika e Kosovës do të fitojë”, ka shkruar Kurti në llogarinë e tij në Facebook.

Kujtojmë se zgjedhjet në veri janë shtyrë për në prill të vitit 2023, ndërsa veriu i Kosovës së fundmi është përballur me sulme sistematike me bomba. Sot janë vendosur edhe barrikada në veri po ashtu. / Gazeta10