Klubi nga Podujeva, Llapi, ka paralajmëruar ankesë pas vendimit të Komisionit të Garave që ndeshja me Malishevën të regjistrohet me rezultatin e arritur në fushë.

Llapi ishte ankuar se Rilind Haziraj i Malishevës ishte inkuadruar pa të drejtë loje. Për këtë, Llapi kërkoi fitore me rezultat zyrtar, pasi në fushë u mposht 2:1. Por Komisioni i Garave i Federatës së Futbollit e ka hedhur poshtë ankesën duke e cilësuar si “të paafatshme”.

Megjithatë, skuadra podujevase pretendon se ankesa është bërë në kohë.

“𝗞𝗿𝗮𝗵𝗮𝘀 𝗮𝗻𝗸𝗲𝘀𝗲̈𝘀 𝗱𝘂𝗵𝗲𝘁 𝗯𝗮𝘀𝗵𝗸𝗮𝗻𝗴𝗷𝗶𝘁𝘂𝗿 𝗳𝗹𝗲𝘁𝗲̈𝗽𝗮𝗴𝗲𝘀𝗲̈𝗻 𝗲 𝘁𝗮𝗸𝘀𝗲̈𝘀 𝗽𝗲̈𝗿 𝗮𝗻𝗸𝗲𝘀𝗲̈ 𝗻𝗲̈ 𝘃𝗹𝗲𝗿𝗲̈ 𝗽𝗿𝗲𝗷 𝟭𝟬𝟬 𝗲𝘂𝗿𝗼. Klubi ynë e ka dorëzuar arsyetimin për ankesën përkatëse dhe pagesën e saj brenda afateve kohore sipas nenit 62 të propozicioneve të garave (𝐩𝐫𝐨𝐯𝐞̈ 𝐞𝐦𝐚𝐢𝐥𝐢 𝐦𝐞 𝐚𝐫𝐬𝐲𝐞𝐭𝐢𝐦𝐢𝐧 𝐞 𝐚𝐧𝐤𝐞𝐬𝐞̈𝐬 𝐝𝐡𝐞 𝐩𝐚𝐠𝐞𝐬𝐞̈𝐬, 𝟏𝟓 𝐦𝐚𝐫𝐬, 𝐨𝐫𝐚 𝟏𝟐:𝟎𝟑). Siç duket Komisioni për Gara nga ngutia për ta refuzuar ankesën nuk i ka shikuar gjitha nenet të cilat përpilohen nga Komiteti Ekzekutiv i Federatës së Futbollit e Kosovës”, ka shkruar Llapi në faqen zyrtare.

Për këtë, Llapi do të paraqesë ankesë në Shkallën e Dytë dhe “do ta ndjekë çdo rrugë të mundshme për ta dërguar deri në fund këtë çështje”.

Më herët, trajneri i Llapit, Tahir Batatina, pretendoi se në vendimin e Komisionit të Garave ka gisht Ballkani.

Ballkani e Llapi po luftojnë për titull kampioni të Superligës. Aktualisht, Ballkani është lider me 51 pikë, një më shumë se Llapi. Të dy skuadrat takohen të shtunën në Suharekë.