Ministri i Mbrojtjes, Armend Mehaj, ka shpalosur investimet që janë bërë nga ministria që ai e drejton, raporton Gazeta10.

Mehaj ka thënë se këto publikime po i bën në mënyrë që të mos ketë keqinformime si dhe që qytetarët të jenë të informuar.

Ministri Mehaj ka thënë se janë zotuar mbi 50 milion euro blerje të armatimit teksa ka thënë se ky buxhet nuk është ndarë asnjëherë më herët.

Tutje, Mehaj ka thënë se janë rekrutuar 1240 ushtarë të rinj si dhe së shpejti do të ketë konkurs të ri për rekrutim.

Këtu keni postimin e plotë:

“Të nderuar qytetarë,

Me qëllim të informimit tuaj të drejtë, dhe që t’i shmangeni keqinformimit po publikojmë disa nga blerjet që janë bërë nga Ministria e Mbrojtjes.

Brenda periudhës së qeverisjes së deritanishme janë zotuar mbi 50 milionë euro blerje të armatimit. Kaq buxhet për kaq ditë qeverisëse, nuk ka ndarë asnjë qeveri më herët.

Buxheti i Ministrisë së Mbrojtjes ka qenë 67 milionë euro, në qeverinë tonë është rritur në 102.3 milionë.

Vetëm për një vit e gjysmë kemi rekrutuar 1240 ushtarë të rinj. Së shpejti do të hapet konkursi edhe për 612 ushtarë aktivë dhe 367 ushtarë rezervë. Kjo nuk ka ndodhur në asnjë qeverisje tjetër.

Këtë vit, deri më tani kemi zotuar 28.6% të buxhetit për blerje. Kjo përqindje do të dyfishohet brenda javëve të ardhshme, kur do të përmbyllen blerjet që janë në proces.

Ministria e Mbrojtjes, vitin që lëmë pas ka shpenzuar 96% të buxhetit, njëherit përqinjda më e lartë e shpenzimit të buxhetit ndonjëherë. Këtë nivel do ta mbajmë edhe në vazhdim”, ka shkruar Mehaj në llogarinë e tij në Facebook. / Gazeta10