Qeveria e Republikës së Kosovës ka dalë me një komunikatë për medie pas takimeve të sotme në Bruksel.

Në njoftimin e Qeverisë bëhet e ditur se në takimin e sotëm janë diskutuar dy tema, raporton Gazeta10.

“Sot kishte dy tema në agjendë. E para ishte diskutimi për Kornizën e Përgjithshme të Marrëveshjes. Kryeministri Kurti theksoi që kjo marrëveshje duhet të jetë ligjërisht e obligueshme për normalizimin e plotë të marrëdhënieve me njohje reciproke në qendër. Ai prezantoi disa kapituj me elemente përkatëse që duhet t’i përmbajë kjo kornizë. Tema e dytë ishin çështjet aktuale politike e të sigurisë për të cilat Kryeministri Kurti tregoi për rëndësinë e ligjshmërisë dhe kushtetutshmërisë në vendin tonë si garancione të paqes, sigurisë dhe barazisë për të gjithë qytetarët pa dallim“, thuhet ndër të tjera në njoftim.

Sot në Bruksel janë takuar Kryeministri i Kosovës, Albin Kurti dhe Presidenti i Serbisë, Aleksandar Vuçiq.

Pas këtij takimi, për media nuk është deklaruar asnjëri nga liderët. Teksa, konferencë për medie ka dhënë Shefi i Lartë për Politikë të Jashtme të BE-së, Josep Borrell, i cili ka thënë se nuk do të dorëzohen deri të gjendet një zgjidhje./Gazeta10