Qendra për Informim, Kritikë dhe Aksion – QIKA, ka filluar kampanjën ndërgjegjësuese për rëndësinë e angazhimit kolektiv kundër dhunës. 

Në qendër të Prishtinës, për dy muaj me radhë do të ekspozohen shifrat alarmante të rasteve të dhunës ndaj grave, transmeton Gazeta10. 

“Dhuna në familje nuk është çështje private!”, është njëri nga slloganet që do të shfaqet bashkë me shifrat e rasteve të dhunës ndaj grave tek Hotel Grand. 

“Të dhënat e pasqyruara janë mbledhur dhe përpunuar nga QIKA përgjatë shtatë muajve të fundit si pjesë e projektit “1 ≠ 1” . Mbi 80% e viktimave të dhunës në familje në Kosovë janë gra, andaj edhe është përdorur qëllimisht shprehja numerike “1 ≠ 1” pasi përshkruan në mënyrë simbolike pabarazitë ekzistuese”, thuhet ndër të tjera në postimin e organizatës në Facebook./Gazeta10