Atleti Muhamet Ramadani e ka fituar medaljen e artë në Kupën Evropiane të hedhjeve në Leiria të Portugalisë.

Ramadani garoi të dielën në hedhje të gjyles, në grupmoshën U23.

Fitoi medaljen e artë me hedhjen më të mirë prej 18.54 metra.

I dyti ishte Lukas Schober i Gjermanisë me hedhjen më të mirë prej 18.21 metrave.

Medaljen e bronztë e fitoi Ali Peker i Turqisë me hedhjen më të mirë prej 17.93 metra.

Ramadani e ka fituar medaljen e artë në Kupën Evropiane të hedhjeve në Portugali edhe vitin e kaluar.

Hedhjen më të mirë vjet e kishte 19.28 metra, që është rekord i Kosovës.

Në vitin 2022 e kishte fituar medaljen e argjendtë. “Edhe një medalje e artë me U23.

Kjo është përmbyllje e kapitullit me seniorët e rinj. Vazhdojmë sfidën si seniorë.

Shpresojmë se ju kemi bërë krenarë”, ka shkruar Shaban Ramadani, babai dhe trajneri i Muhamet Ramadanit, atletit më të mirë në vend.

Kupa Evropiane ka mbledhur hedhësit më të mirë të kontinentit, që kanë garuar te seniorët dhe te grupmosha U23.