Një 30-vjeçar është arrestuar në kuadër të operacionit të koduar “Gold”, pasi u kap duke transportuar me automjetin e tij monedha dhe lingota floriri, para, si dhe një leje drejtimi të dyshuar të falsifikuar.
Sipas Policisë së Fierit, specialistët për Hetimin e Krimeve Ekonomike, në bashkëpunim me shërbimet e Forcave Operacionale dhe “Shqiponja”, ndaluan për kontroll automjetin me drejtues shtetasin A. B., 30 vjeç, banues në Roskovec.
Gjatë kontrollit të automjetit u gjetën dhe u sekuestruan 9 monedha floriri, 4 lingota floriri, 4000 euro dhe 93 mijë lekë. Sipas uniformave blu, 30-vjeçari nuk dispononte dokumentacion që të justifikonte origjinën apo burimin e sendeve me vlerë dhe parave.
Kontrolli vijoi edhe në banesën e tij, ku u gjet një leje drejtimi e dyshuar e falsifikuar.
Në përfundim të veprimeve të para hetimore dhe procedurale, 30-vjeçari u arrestua dhe ndaj tij rëndojnë akuzat për veprat penale “Pastrimi i produkteve të veprës penale ose veprimtarisë kriminale”, “Tregtimi dhe transportimi i mallrave që janë kontrabandë” dhe “Falsifikimi i letërnjoftimeve, i pasaportave ose i vizave”.
Automjeti dhe sendet e sekuestruara janë vendosur në dispozicion të hetimit. Materialet procedurale i janë referuar Prokurorisë për veprime të mëtejshme, ndërsa pritet të nisë edhe hetimi pasuror, me qëllim dokumentimin e burimit të floririt dhe parave të gjetura.
Gazeta 10 është pjesë e Java Multimedia Production, që ka në pronësi edhe Kanal10 dhe Radio10.
Gazeta 10 është portal informativ që udhëhiqet nga gazetarë me përvojë dhe angazhohet për gazetari cilësore e profesionale, në kërkim të lajmit të fundit, kudo në Kosovë dhe jashtë saj.
Materialet e Gazeta10 mund të rishpërndahen duke e cituar drejt burimin.
Email: info@gazeta10.com
Gazeta10, © 2026 Të gjitha të drejtat e rezervuara.
