Raporti: Gresa Bardhecaj  

Pjesëtarë të shoqatës krimet e luftës “Gjakova 98&99” kanë dorëzuar tre kallëzime penale në Prokurorinë Speciale ndaj nënkryetarit të Kuvendit të Serbisë, Bozhidar Deliq, i cili dyshohet se ka kryer krime lufte në këtë rajon. Nga kjo shoqatë kanë thënë se kanë mbledhur fakte dhe dëshmi të mjaftueshme të cilat dëshmojnë se Deliq ka marrë pjesë dhe ka dhënë urdhër për të kryer krime, raporton Kanal10. 

Me gjithë reagimet e kundërshtimet, para pak ditësh u ul në karrigen e nënkryetarit të Kuvendit të Serbisë.  

Por, para se ta merrte këtë post, Bozhidar Deliq, ka marrë pjesë në shumë masakra që janë kryer në Kosovë gjatë luftës së fundit.   

Për të dokumentuar krimet e tij, tri kallëzime penale janë dorëzuar gjatë së martës në Prokurorinë Speciale në Prishtinë.  

Kryetarja e shoqatës krimet e luftës “Gjakova 98&99”, Shkëndije Hoda, së bashku me Gjokë Sokolin, thonë se ka dëshmi të mjaftueshme për krimet që Deliq i ka kryer në rrethin e Gjakovës.  

Përveç tyre, kallëzim penal ndaj nënkryetarit të Kuvendit të Serbisë, vite më parë kishte deponuar edhe Fondi për të Drejtën Humanitare në Beograd.   

Bekim Blakaj që udhëheq me Fondin në Prishtinë, thotë se roli i Deliqit në luftën e fundit në Kosovë është dëshmi për përfshirjen e tij në krime kundër njerëzimit.  

Janë dhjetëra raste kur janë deponuar me qindra e mijëra dosje për krimet serbe në Kosovë, megjithëse shumë prej tyre nuk kanë marr trajtim nga institucionet e drejtësisë./Kanal10