Ministri i Mbrojtjes, Armend Mehaj, me një status në faqen e tij në Facebook ka shkruajtur për Adem Demaçin, të cili e njohi si prijësin më të denjë, idealist e të pakompromis, raporton Gazeta 10.

Adem Demaçi 24 vite më parë kishte marr detyrën e përfaqësuesit politik të Ushtrisë Çlirimtare të Kosovës.

“Ai ishte prijësi ynë më i denjë, më i drejti, idealisti i pakompromis, më i guximshmi e më largpamësi ndër ne, i panënshtrueshëm, lirinë e deshi më shumë se çdo gjë tjetër:

”Kam ecur lirshëm, sepse kam dashur të jem i lirë, unë nuk mund ta pranoja që të jetoja si një mi në një vrimë, për sa kohë që unë jetoj dua të jetoj si një luan. Kur më duhet të vdes, do të vdes”, ky ishte baca Adem. Në rrugën tonë drejt të ardhmes, në ndërtimin e Republikës, në forcimin e ushtrisë sonë, nuk kemi se si të ecim nëse bacën Adem nuk e kemi me vete” ka shkruar ai.

Sipas ministrit, Sllogani “Rroftë Shqipëria, nëna jonë” i shkruar në secilin qytet të Kosovës më 12 prill 1964, është destinacioni që synonte baca Adem. Ai, UÇK-ja, Kosova, liria dhe Shqipëria, do të mbeten përjetësisht të pandarë nga njëri-tjetri”. / Gazeta10.