Mëngjesin e së enjtes, Presidenti i Francës, Emmanuel Macron gjatë qëndrimit në Lausanne të Zvicrës ka folur edhe për Kosovën, shkruan 24heures.ch, përcjell Reporteri.

Macron derisa po zhvillonte takim me studentë në Universitetin e vendit (UNIL) është pyetur edhe për tensionet e fundit në Kosovë.

“Janë qetësuar pak tani”, tha presidenti francez.

Macron shpreson që liderët e dy vendeve, Kryeministri i Kosovës, Albin Kurti, dhe Presidenti i Serbisë, Aleksandar Vuçiq të arrijnë marrëveshjen që u është ofruar.

Presidenti francez megjithatë ka frikë nga konfliktet etno-fetare që po zhvillohen në rajone të ndryshme të botës.

“Jam i shqetësuar, por nuk kam frikë nga një rifillim i konfliktit në Kosovë”, përfundon ai.

Në vazhdën e dialogut, sot në Bruksel po zhvillohet takim mes kryenegociatorëve Besnik Bislimi dhe Petar Petkoviq.

Fillimisht, emisari evropian për dialogun Kosovë-Serbi, takoi Petar Petkoviq, derisa aktualisht ndodhet në takim me zëvendëskryeministrin, Besnik Bislimin, dhe nëse të dyja palët kanë vullnet do të zhvillohet edhe një takim tre palësh.