Rusia e ka financuar Partinë Demokratike të Shqipërisë me 500 mijë dollar më 2017, shkruan BBC, raporton Gazeta10.

Rusia ka shpenzuar fshehurazi më shumë se 300 milionë dollarë (260 milionë £) që nga viti 2014 për të ndikuar tek politikanët në më shumë se 24 vende, ka pretenduar SHBA.

Pretendimi i Departamentit të Shtetit bazohet në një vlerësim të deklasifikuar të inteligjencës amerikane të publikuar të martën.

Një zyrtar i lartë nga administrata e Presidentit Joe Biden tha: “Ne mendojmë se kjo është vetëm maja e ajsbergut”.

Rusia nuk ka komentuar publikisht për këtë çështje. Vetë Moska ka akuzuar vazhdimisht SHBA-në për ndërhyrje jashtë vendit.

Inteligjenca amerikane “vlerëson se këto janë shifra minimale dhe se Rusia ka të ngjarë të ketë transferuar fonde shtesë fshehurazi në rastet që kanë mbetur të pazbuluara”, tha zyrtari i administratës Biden gjatë një konference telefonike.

Zyrtari foli në kushte anonimiteti.

Vlerësimi i inteligjencës amerikane i lëshuar në një kabllogram nuk përmendi vende ose zyrtarë të veçantë që besohet se janë shënjestruar nga Rusia – por tha se ato përfshinin katër kontinente.

Zyrtari i administratës tha se komuniteti i inteligjencës amerikane tani po informonte privatisht vendet e zgjedhura mbi financimin e supozuar të fshehtë rus. Konferencat do të mbeten konfidenciale, shtoi zyrtari.

Një burim i administratës i njohur me gjetjet pretendoi se Rusia kishte shpenzuar rreth 500,000 dollarë për të mbështetur Partinë Demokratike të qendrës së djathtë të Shqipërisë në zgjedhjet e vitit 2017 dhe gjithashtu financoi partitë ose kandidatët në Bosnjë, Mal të Zi dhe Madagaskar, sipas agjencisë së lajmeve AFP. / Gazeta10