Ministri i Punëve të Jashtme, Glauk Konjufca, ka dënuar sot sulmin e rebelëve Huthi ndaj Aeroportit Ndërkombëtar në Riad të Arabisë Saudite.

Konjufca në një postim në rrjetin X ka shprehur mbështetjen e Kosovës për Arabinë Saudite dhe popullin e saj në këtë kohë të vështirë, raporton KosovaPress.

“Dënoj fuqishëm sulmin shkatërrues të Huthëve ndaj Aeroportit Ndërkombëtar “King Khalid” në Riad, i cili la civilë të vrarë dhe shumë të tjerë të plagosur. Sulme të tilla ndaj aviacionit civil përbëjnë një kërcënim serioz për jetën e njerëzve dhe duhet të ndalen. Shpreh ngushëllimet e mia të sinqerta për familjet e të vrarëve dhe u uroj shërim të shpejtë të plagosurve”, shkroi ai.
Huthi janë një grup i armatosur politik nga Jemeni verior, i mbështetur nga Irani. Ata rreshtohen me “boshtin e rezistencës” të udhëhequr nga Irani kundër Izraelit, SHBA-së dhe Perëndimit në përgjithësi së bashku me Hamasin dhe Hezbollahun.

Ata u shfaqën në vitet 1990 dhe udhëhiqen nga Abdul Malik al-Houthi. Ata synojnë të rrëzojnë qeverinë e Jemenit që gëzon mbështetje ndërkombëtare.

Aktualisht, grupi kontrollon një sipërfaqe që varion nga një e katërta deri në një të tretën e territorit të Jemenit dhe 70-80% të popullsisë së tij.
Arabia Saudite është rivale e Iranit. Ajo kishte frikë se Huthët do të merrnin kontrollin e Jemenit dhe do ta shndërronin atë në një shtet satelit të Iranit.

Kështu, në vitin 2015, ajo formoi një koalicion vendesh arabe – të mbështetur nga SHBA-ja – i cili ndërhyri në mbrojtje të qeverisë së Jemenit të njohur ndërkombëtarisht.

Ndër vite, Arabia Saudite ka kryer sulme ajrore dhe Huthët kanë lëshuar dronë e raketa, por sauditët nuk kanë arritur t’i dëbojnë Huthët nga pjesa më e madhe e territorit që ata kanë pushtuar. Luftimet kanë shkaktuar një krizë të rëndë humanitare në Jemen.

Një armëpushim joformal kishte qenë në fuqi midis koalicionit të udhëhequr nga Arabia Saudite (që mbështet qeverinë jemenase të njohur ndërkombëtarisht) dhe lëvizjes Huthi që nga marsi i vitit 2022.
Situata më pas u përkeqësua. Pas sulmeve të Hamasit më 7 tetor 2023, Huthi filluan të lëshonin dronë dhe raketa drejt Izraelit. Grupi deklaroi se po vepronte në mbështetje të palestinezëve.

Në korrik, Huthi shpallën një “embargo detare” kundër Arabisë Saudite, duke rifilluar sulmet me raketa dhe dronë ndaj porteve dhe impianteve të saj të naftës.
Ata thanë se po hakmerreshin për atë që e cilësojnë si një bllokadë shumëvjeçare saudite, si dhe për një sulm ajror në aeroportin e Sanasë.

Konflikti është intensifikuar më tej javët e fundit, pasi grupi rebel pushtoi zona të gjera të bregdetit të Detit të Kuq gjatë një sulmi të befasishëm në shtator. Në përgjigje, Arabia Saudite nisi sulme ajrore.