Komentatori politik Krenar Shala, në emisionin “Politiko”, ka folur për mundësinë e dorëheqjeve të ministrave pas dështimeve të dyshuara institucionale në trajtimin e rastit të Arlinda Zekajt.

Shala ka thënë se vendimi për dorëheqje u takon vetë ministrave, duke theksuar se një veprim i tillë mund të jetë i arsyeshëm, por jo domosdoshmërisht i detyrueshëm.

“Sa i përket dorëheqjeve të ministrave, le të mbetet në ndërgjegjen e ministrave. Ndoshta është e udhës të japin dorëheqje, por jo domosdoshmërisht”, ka deklaruar Shala.

I pyetur se çfarë efekti do të kishte dorëheqja e ministrave, komentatori politik ka shprehur skepticizëm se një veprim i tillë do të ndikonte në parandalimin e rasteve të tjera të vrasjeve të grave.

“Kurrfarë efekti. Jo, prapë vrasjet do të vazhdojnë, fatkeqësisht. Problemi është se jemi shoqëri konservatore”, është shprehur Shala në “Politiko”.