Ministri i Bujqësisë, Pylltarisë dhe Zhvillimit Rural, Faton Peci, ka vizituar sot bujqit dhe blegtorët e Dragashit, raporton Gazeta10.

Ai ka takuar dy familje që merren me këtë lëmi në Bellobrad dhe Zaplluzha të Drgashit.

Peci ka thënë se përmes Programit për Zhvillim Rural 2023 do të ketë rritje të fondeve.

Më tej, ai ka thënë se është tejet me rëndësi që tregu vendor të dominohet nga bagëtia vendase.

Këtu keni postimin e plotë:

“Të mirat na vijnë nga bujqit e blegtorët e vyer që përmes punës së tyre, begatojnë Kosovën.

Djathi i Sharrit është dukat në vete, me të cilin matet vlera e kësaj zone.

E duart e arta të grave Sharrit japin këtë rezultat.

Me një traditë shumë-vjeçare, Kymete Shefiku së bashku me dy punëtore të saja nga fshati Bellobrad i Komunës së Dragashit; përpunojnë qumështin e freskët në djath cilësor dhe e shesin tek bizneset agro-turistike vendase duke përmbullur me sukses ciklin nga ferma në tryezë.

Mjegulla e bjeshkës nuk ia zbeh shikimin qenit të Sharrit i cili ruan me fanatizëm tufën e deleve të familjes Myrtezani nga Zaplluxha.

Këtë vit, përmes Programit për Zhvillim Rural 2023, do të përkujdesemi që të rrisim fondin blegtoral pasi që është tejet e rëndësishme që tregu vendor të dominohet me qumësht e mish cilësor, nga bagëtitë e kontrolluara vendase.

Familja Myrtezani mbarështon rreth 350 krerë dele, 100 qingja, 50 krerë dhi, 15 keca, 40 krerë lopë, dhe 15 krerë viça për shtim të races”, ka shkruar Peci në llogarinë e tij në Facebook. / Gazeta10.