Kryetari i Lidhjes Demokratike të Kosovës, Lumnir Abdixhiku, ka vizituar Manifesta 14 që po mbahet në Kosovë, e për të cilën ka thënë se i ka dhënë shpirt kulturor Prishtinës, raporton Gazeta10

Ai ka qenë pjesë e ndërhyrjes artistike të artistes së mirënjohur japoneze Chiharu Shiota, të ekzpozuar në Hamamin e Madh të Prishtinës.

Abdixhiku ka thënë se ndërhyrjet e tilla artistike kanë bërë që Prishtina të merr vëmendje të mediave ndërkombëtare.

Këtu keni statusin e plotë:

“TREGOMA RRËFIMIN TËND

Me Shqipen, Jehonën e Sibelin, sot pamë ndërhyrjen artistike të artistes së mirënjohur japoneze, Chiharu Shiota, të ekspozuar në Hamamin e Madh të Prishtinës, pjesë e Manifestës 14 – që këto ditë vere i ka dhënë shpirt kulturor kryeqytetit.

Mbi një mijë ese, rrëfime personale të kosovarëve mbi fëmijërinë, familjen, vendin, lindjen, besimin, dashurinë dhe vet dhimbjen – janë pjesë e ekspozitës së titulluar “Tregoma rrëfimin tënd”.

Ndërhyrjet artistike si këto, në çdo kënd të harruar të Prishtinës, kanë bërë që kryeqyteti ynë të marrë vëmendje në publikimet ndërkombëtare – dhe kjo, në vete, është arritje e shënuar tashmë”, ka shkruar Abdixhiku në llogarinë e tij në Facebook.

Përndryshe, Manifesta, Bienalja Nomade Evropiane, ka filluar aktivitetin e saj në Kosovë qe disa ditë ku do të ketë një program 100 ditor. / Gazeta10