Ministrat e Jashtëm të Ballkanit Perëndimor sot miratuan tri marrëveshje rajonale – atë për lirinë e lëvizjes me letërnjoftim, për njohjen e kualifikimeve të arsimit të lartë dhe për njohjen e kualifikimeve profesionale për doktorët e mjekësisë, stomatologët dhe Arkitektët, në takimin ministror të BB-BE, organizuar në kuadër të Procesit të Berlinit nga qeveria gjermane sot në kryeqytetin e tyre.

Sekretarja e Përgjithshme e RCC, pas miratimit të këtyre marrëveshjeve ka thënë se u është dashur dy vjet negociata intensive për marrëveshjen e sotme për të lëvizur me leternjoftime në Ballkanin Perëndimor.

“Lëvizja me letërnjoftime në Ballkanin Perëndimor është marrëveshja e sotme. Na u deshën vërtet gati dy vjet negociata intensive për të marrë versionin konsensual, sot, por ku ka vullnet, ka dhe rrugë. Kjo marrëveshje shemb murin e fundit të vizave të mbetura në rajon. E di, asnjë regjim vizash në rajon nuk është i njëjtë me mungesën e regjimit të vizave me BE-në. Por, realisht, ky është titulli i një rajoni, një tregu. Politikat kombëtare mbeten kyçe për të gjithë, por ato mund të luajnë gjithashtu një rol të rëndësishëm për zbatimin më efektiv të nismave rajonale. E gjithë kjo me synimin e lidhjes dhe bashkimit rajonal. Bashkëpunimi dhe solidariteti rajonal dhe shumëpalësh janë në plan të parë në kohë krizash”, tha ajo.

Të tri marrëveshjet pritet të nënshkruhen në Samitin e Procesit të Berlinit të Kryetarëve të Shteteve dhe Qeverive, i caktuar për në 3 nëntor në kryeqytetin gjerman./Gazeta10