Çmimet e naftës u rritën në 100 dollarë (74 £) për fuçi të mërkurën, pasi SHBA-ja dhe Irani sulmuan cisterna në rajonin e Gjirit dhe rebelët Houthi të Jemenit goditën objekte të naftës në Arabinë Saudite, ka raportuar BBC.

Gjatë natës, SHBA-ja njoftoi se kishte goditur pesë cisterna iraniane si hakmarrje për sulmin e Iranit ndaj një anijeje luftarake, ndërsa Garda Revolucionare e Iranit deklaroi se kishte sulmuar tetë cisterna dhe dy anije luftarake në përgjigje, si dhe një bazë amerikane në Jordani.

Garda gjithashtu njoftoi planet për krijimin e një “zone të ndaluar” të re për lundrimin detar, e cila shtrihej përtej Ngushticës së Hormuzit deri në Detin Arabik.

Rebelët Houthi, të mbështetur nga Irani, raportuan për dhjetëra sulme saudite në Jemen, një ditë pasi sulmet me dronë dhe raketa shkaktuan zjarre në disa objekte të naftës në Arabinë Saudite.

Përshkallëzimi i konflikteve e çoi çmimin e naftës së papërpunuar “Brent” – referenca globale e çmimeve – në nivelin më të lartë që nga fundi i korrikut, kur Irani dhe SHBA-ja rifilluan armiqësitë pas një periudhe qetësie njëmujore.

Të mërkurën pasdite, çmimi i një fuçie ishte 100,70 dollarë, një rritje prej 2,83% krahasuar me të martën.

Para se të fillonte lufta midis SHBA-së e Izraelit dhe Iranit në muajin shkurt, çmimi i naftës “Brent” ishte rreth 70 dollarë (52 £) për fuçi.