Kolegjiumi i Drejtorëve të Bujqësisë është mbledhur sot në Istog me ftesën e Artan Gegajt. Nga atje është kërkuar përkrahje dhe kompensim për dëmet e shkaktuara ndaj bujqve dhe fermerëve.

“Sot në Istog, me ftesën time, mbajtëm takimin e Kolegjiumit të Drejtorëve të Bujqësisë, në kuadër të Asociacionit të Komunave të Kosovës, ku morën pjesë drejtorët e bujqësisë nga komunat e Kosovës.

Në këtë takim diskutuam për problemet me të cilat po përballen fermerët, ku fokus i veçantë ishte mungesa e kompensimit të dëmeve nga fatkeqësitë natyrore dhe kafshët e egra, si dhe mungesa e thirrjeve për grante dhe projekte të zhvillimit rural tash e tri vite.

Nga ky takim i bëjmë thirrje Ministrisë së Bujqësisë dhe Qeverisë së Kosovës që të reflektojnë dhe të marrin masa konkrete.

Kërkojmë kompensimin e dëmeve për fermerët, hapjen e thirrjeve për grante dhe rifillimin e projekteve të zhvillimit rural. Fermerët meritojnë vëmendjen dhe mbështetjen e institucioneve.

Ne do të jemi gjithmonë në krah të fermerëve tanë dhe do t’i ndihmojmë e mbështesim me të gjitha mundësitë që kemi, duke u angazhuar që kërkesat dhe problemet e tyre të marrin zgjidhjen e merituar” shkruan Artan Gegaj, drejtor i Bujqësisë në Istog.