Tre anije të ngarkuara me grurë sipas një marrëveshjeje të arritur së fundmi janë eksportuar nga portet e Ukrainës, shkruan Reuters, transmeton Gazeta10.

Tre anijet që transportonin një total prej rreth 58,000 ton misër janë autorizuar të largohen nga portet e Ukrainës si pjesë e një marrëveshjeje për të zhbllokuar eksportet e grurit.

Ministria turke e Mbrojtjes tha në Twitter se Navistar me flamurin e Panamasë, që mbante 33,000 ton misër dhe shkonte nga Ukraina në Irlandë, u nis nga porti i Odesës. Anija do të inspektohet nga Qendra e Përbashkët Koordinuese në veri të Stambollit.

Anija e dytë, Rojen me flamur maltez, me 13,000 ton misër u nis nga porti Chornomorsk me destinacion Britaninë. Ekipi i Përbashkët i Inspektimit do ta monitorojë atë.

Anija Polarnet me flamur turk u nis nga Chornomorsk drejt portit turk Karasu në Detin e Zi. Përpara se anija që transportonte 12,000 ton misër të arrijë në Karasu, ajo do të inspektohet nga Ekipi i Përbashkët i Inspektimit në veri të Stambollit.

Këtë javë është nisur anjia e parë me grurë nga Ukraina që nga fillimi i pushtimit rus.

Ukraina është një eksportues kryesor i drithërave, por dërgesat e saj kanë rënë që nga fillimi i luftës, sepse portet e saj në Detin e Zi – një rrugë kyçe për dërgesat e saj – janë mbyllur kryesisht, duke rritur çmimet globale të ushqimit dhe duke shkaktuar frikë nga mungesa në Afrikë dhe Lindjen e Mesme. / Gazeta10