Më shumë se 1,000 zjarrfikës të mbështetur nga avionët bombardues me ujë luftuan me një zjarr “përbindësh”  në Bordo, për të tretën ditë pa reduktim të temperaturave të ashpra që u mbizotëruan para fundjavës, shkruan Reuters, transmeton Gazeta10.

Zjarri në rajonin Gironde, një nga disa zjarret kryesore në Francë, ka detyruar mijëra njerëz të largohen nga shtëpitë e tyre, ka shkatërruar më shumë se një duzinë prona dhe ka djegur më shumë se 6,800 hektarë pyje.

“Është një ogre, është një përbindësh,” tha Gregory Allione nga organi francez i zjarrfikësve FNSPF për radion RTL.

Zjarri në Gironde është një nga të shumtët që ka shpërthyer në të gjithë Evropën këtë verë, i shkaktuar nga valët e të nxehtit që kanë pjekur kontinentin dhe kanë sjellë temperatura rekord.

Kryeministrja Elisabeth Borne do të vizitojë këtë zonë më vonë.

Temperaturat lokale do të arrijnë 40 Celsius (104 Fahrenheit) të enjten dhe do të qëndrojnë të larta deri të shtunën, paralajmëruan autoritetet.

“Është një fatkeqësi, ekonomikisht, ekologjikisht, është e tmerrshme,” tha për Radio Classique Jean-Louis Dartiailh, kryebashkiaku i Hostens, një qytet i vogël afër zjarrit. “Zona është shpërfytyruar totalisht. Na është thyer zemra, jemi të rraskapitur.”

Më shumë se 57,200 hektarë janë djegur nga flakët deri më tani në Francë, gati gjashtë herë më shumë se mesatarja e vitit 2006-2021, tregojnë të dhënat nga Sistemi Evropian i Informacionit për Zjarret në Pyje.  / Gazeta10