Një haker që flet gjuhën kineze ka përdorur agjentë të inteligjencës artificiale për të kryer në mënyrë autonome sulme kibernetike ndaj më shumë se 1,200 faqeve interneti, duke përfshirë kompani të mëdha amerikane dhe ndërkombëtare.

Sipas një raporti të publikuar nga studiuesi i sigurisë kibernetike Snorre Fagerland, hakeri u ka deleguar pothuajse të gjithë punën agjentëve të AI, të cilët kanë kaluar orë të tëra duke kërkuar dobësi dhe duke tentuar të depërtojnë në sistemet e kompanive të ndryshme.

Mes kompanive të prekura ishin prodhuesi i pajisjeve bujqësore Deere, kompania e pajisjeve elektroshtëpiake SharkNinja dhe prodhuesi i motorëve Cummins.

Fagerland, studiues kryesor i kërcënimeve në kompaninë e sigurisë kibernetike NorForge, tha se zbulimi përbën një shembull konkret të mënyrës se si AI mund të përdoret për të realizuar sulme komplekse kibernetike nga fillimi deri në fund, me shumë pak ose aspak ndërhyrje njerëzore.

“Është një botë e re tani”, tha Fagerland.

Mbi 1,200 objektiva dhe vetëm pak udhëzime

Sipas hetimit, fushata e sulmeve nisi më 25 shtator dhe kishte në shënjestër faqe të tregtisë elektronike në SHBA, Kanada, Australi dhe Japoni.

Udhëzimet që hakeri u jepte agjentëve të AI ishin tepër të shkurtra, në më pak se 100 karaktere në gjuhën kineze. Megjithatë, agjentët ishin në gjendje të kryenin vetë kërkime të gjata për dobësi dhe të përshtatnin strategjitë e tyre gjatë sulmit.

Deri në fund të javës së kaluar, agjentët kishin tentuar të depërtonin në më shumë se 1,200 faqe interneti. Sulmet e suksesshme kërkonin mesatarisht rreth 23 orë kërkim dhe testim të vazhdueshëm të sistemeve.

Fagerland vlerëson se fushata ka konsumuar rreth 5,000 dollarë në tokenë të inteligjencës artificiale, ose afërsisht 50 dollarë për çdo depërtim të suksesshëm.

Sipas tij, hakeri duket se ka përdorur një kombinim të teknologjive të DeepSeek dhe Claude Code.

AI gjeti dobësi që nuk ishin të dukshme

Një nga rastet që impresionoi më shumë studiuesin ishte ai i një kompanie të madhe, ku agjentët e AI nuk arritën fillimisht të gjenin dobësi në aplikacionin publik të kompanisë.

Në vend që të ndalonin, ata analizuan të dhëna dhe regjistrime dixhitale për të identifikuar infrastrukturën e lidhur me sistemin. Më pas gjetën një panel kontrolli të ekspozuar në internet dhe zbuluan një dobësi në mënyrën se si ai përpunonte të dhënat.

Pas disa orësh provash, agjentët raportuan se kishin arritur ta shfrytëzonin dobësinë për të bërë serverin të ekzekutonte komanda të dëmshme.

“Nuk është e thjeshtë të gjesh zgjidhje të tilla. Nuk është punë e hakerëve amatorë”, deklaroi Fagerland.

Kompanitë konfirmojnë incidentet

Reuters nuk arriti të përcaktojë nëse sulmet çuan në vjedhje të paautorizuar të të dhënave.

Kompania Deere deklaroi se kishte ndërmarrë “masat e nevojshme korrigjuese” pas incidentit dhe se nuk kishte të dhëna që informacionet sensitive të ishin aksesuar.

SharkNinja tha se sulmi kishte prekur një faqe të veçuar, e cila përmbante vetëm informacione për mbështetjen e produkteve, ndërsa kërcënimi ishte neutralizuar.

Ndërkohë, Cummins bëri të ditur se po hetonte raportin për një sulm të mundshëm kibernetik ndaj një faqeje të operuar nga një prej ofruesve të saj të shërbimeve.

Frika për “hakerët autonomë” rritet

Përdorimi i agjentëve autonomë të AI për të zbuluar dobësi, për të kryer sulme dhe për të vjedhur të dhëna po shndërrohet në një shqetësim gjithnjë e më të madh në botën e sigurisë kibernetike.

Në muajt e fundit janë dokumentuar raste ku kriminelë kibernetikë kanë përdorur mjete të inteligjencës artificiale për të depërtuar në organizata dhe për të vjedhur të dhëna sensitive.

Fagerland tha se më parë mendonte se hakerët që përdornin agjentë të AI do të kishin nevojë për të paktën një nivel mbikëqyrjeje njerëzore. Por pas këtij zbulimi, ai beson se teknologjia ka kaluar tashmë një tjetër prag.

“Zhvillimi në këtë fushë është i jashtëzakonshëm”, tha studiuesi i sigurisë kibernetike.