Trajneri i Romës, Jose Mourinho thuhet se ka marrë një ofertë prej 120 milionë eurosh për të trajnuar për dy vite në Arabinë Saudite.

Sipas Corriere dello Sport, oferta dyvjeçare, 60 milionë euro për çdo sezon, mbërriti drejtpërdrejt nga zyrtarët më të lartë të futbollit të Arabisë Saudite, për të trajnuar ose ekipin kombëtar ose njërin klub mes Al-Nassr ose Al-Ahli.

Kombëtarja e Arabisë Saudite, e drejtuar nga Herve Renard, tronditi botën me fitoren e tyre në Kupën e Botës ndaj Argjentinës. Trajneri francez u largua nga posti i tij pas turneut dhe ka marrë detyrën si trajner i ekipit të femrave të Francës.

Al-Nassr transferoi Cristiano Ronaldon në një transferim të lirë në janar, duke e nënshkruar atë me një marrëveshje tepër fitimprurëse dyvjeçare e gjysmë.

Raportet e fundit në media sugjerojnë gjithashtu se ata kanë përgatitur një ofertë totale prej 400 milionë euro për Lionel Messin, kontrata e të cilit me Paris Saint-Germain skadon në qershor.

Mourinho ka diskutuar tashmë ofertën prej 120 milionë euro me stafin e tij, ku i janë thënë një sërë mendimesh të ndryshme.

Megjithatë, trajneri portugez dëshiron të qëndrojë me Romën dhe tani është në pritje të një takimi me pronarët e klubit italian përpara se të marrë ndonjë vendim. Me Romën, Mourinho është fitues i Ligës së Konferencës në sezonin 2021/22, duke mposhtur në finalen e Tiranës Feyenoordin me rezultat 1-0.