Luka Modric në fund të sezonit pritet t’i japë fund aventurës së tij 12-vjeçare te Real Madridi.

Kontrata e mesfushorit kroat me “Los Blancos” skadon në qershor dhe palët do t’i ndajnë rrugët me të përfunduar edicioni aktual.

Destinacioni i radhës për legjendën kroate do të jetë jashtë Evropës, me disa skuadra nga Major League Soccer dhe Saudi Pro League që po kërkojnë me ngulm transferimin e tij.

Nga Shtetet e Bashkuara të Amerikës për kroatin ka shprehur interesim Inter Miami, ku luajnë edhe yjet e futbollit botëror si Lionel Messi, Luis Suarez, Sergio Busquets dhe Jordi Alba.

Ndërsa, në Lindjen e Mesme për Modricin kanë shprehur interesim Al-Hilal, Al-Ahli dhe Al-Nassr.

38-vjeçari gjatë periudhës së tij te Real Madridi ka luajtur rol kyç në sukseset e shumta të kësaj skuadre në dekadën e fundit.

Këtë edicion ai ka shënuar dy gola dhe ka dhuruar gjashtë asistime në 29 paraqitje në të gjitha garat.

Mesfushori kroat ka fituar plot 23 trofe me ekipin madrilien.