Gazeta10

Kurti: Në kohën me rreziqe për siguri globale, e vlerësojmë mbështetjen e NATO-s për Kosovën

Kryeministri i Republikës së Kosovës, Albin Kurti, ka marrë pjesë në ekspozitën e fotodokumentarit “KFOR and Kosovo + 25” që shënon edhe 25-vjetorin e hyrjes së trupave të KFOR-it në Kosovë, ekspozitë kjo që po shfaqet në ambientet e Muzeut Kombëtar të Kosovës.

Përmes një komunikate për media, Zyra e Kryeministrit njofton se Kurtit fillimisht iu prezantua ekspozita me fotografi të fotografit Nick Sidle, nga organizatorja e organizatës “Heartstone” Sita Kumari.

Në fjalën e tij, kryeministri Kurti tha se ende ishte nën mbresat e këtyre fotografive të kësaj ekspozite që porsa i pa në një mënyrë të dyfishtë, duke përmendur se ka qenë edhe vetë rob lufte për dy vitet e gjysmë të para të lirisë.

Mes tjerash, Kurti ka thënë se në një periudhë të shënuar me rreziqe të konsiderueshme për sigurinë evropiane dhe globale, vlerëson rolin thelbësor të NATO-s dhe mbështetjen e dhënë për Kosovën dhe sigurinë e saj.

“Ne po shikojmë prapa në kohë që të ecim më sigurt dhe më shpejtë në të ardhmen evropiane e paqësore, demokratike e prosperuese.

Në këtë periudhe të shënuar me rreziqe të konsiderueshme për sigurinë evropiane dhe globale, ne e vlerësojmë thellësisht rolin thelbësor të NATO-s dhe mbështetjen e dhënë për Kosovën dhe sigurinë tonë. Me synim të qartë dhe përkushtim të pa rezervë për rrugën euroatlantike, falënderojmë çdo vend anëtar të NATO-s, asokohe ishin 19-të sot janë 32  për rolin dhe kontributin për vendin tonë”, ka thënë Kurti.

Fjala e plotë e Kurtit:

Ende jam nën mbresat e këtyre fotografive, të kësaj ekspozite që porsa e pash në një mënyrë të dyfishtë; e para për shkak se jemi në vigjilje të 25- vjetorit të çlirimit e të paqes, të hyrjes së trupave të NATO’s në Kosovë; dhe së dyti, për shkak se dy vitet e gjysmë të para të lirisë unë kam qenë rob lufte. Nga i burgosur politik me datën 10 qershor, bëhem rob lufte dhe është kjo pjesë e cila më mungon. Janë ato dy vite e gjysmë të para të cilët nuk i di për shkak se kam qenë i mbyllur dhe i izoluar, dhe të gjitha këto ekspozita dhe shfaqje e paraqitje të cilat na kthejnë 25 vite përpara nuk janë të tilla që më rikujtojnë mua sa më mësojnë për atë që më mungon. Andaj falënderoj me mirënjohjen më të thellë organizatoren për këtë.

Faleminderit e nderuara zonja Sita Kumari, Drejtoreshë e Heartstone,

I nderuar Lord George Robertson, ish-Sekretar i Përgjithshëm i NATO-s dhe ministër i Mbrojtjes në Mbretërinë e Bashkuar,

I nderuar ambasador i Mbretërisë së Bashkuar në Kosovë, z. Jonathan Hargreaves,

Shkëlqesi ambasadorë të vendeve mike,

Unë jam këtu bashkë me shumë anëtarë të kabinetit të Qeverisë; me dy zëvendëskryeministret Donika Gërvalla Schwarz dhe Emilija Rexhepi dhe me disa ministra për të treguar përkushtimin tonë si Qeveri për trashëgiminë e përbashkët të çlirimit të Kosovës dhe të paqes në vendin tonë.

Përshëndes edhe të gjithë deputetët e Kuvendit të Republikës, Nënkryetaren, Saranda Bogujevci e cila vetë është e mbijetuar me 16 plumba në trup nga 28 marsi i vitit 1999 dhe më pastaj e shëruar në Manchester të Mbretërisë së Bashkuar.

E nderuar znj.Vjollca Aliu,  zëvendësdrejtoreshë e Muzeut Kombëtar të Kosovës,

Të nderuar të pranishëm këtu që jeni dhe online, në veçanti fotografin Nick Sidle,

Jemi pra në ditët të cilat shënojnë 25- vjetorin e Çlirimit dhe pashmangshëm këto na kthejnë një çerek shekulli më parë, kur populli i Kosovës po i përjetonte ditët e fundit të luftës.

Më 10 qershor 1999, NATO-ja e pat përfunduar fushatën e bombardimeve mbi Jugosllavi, dhe i dha fund planit gjenocidal të Serbinë së Millosheviqit për shfarosjen e popullsisë shqiptare në Kosovë. Këshilli i Sigurimit i OKB-së e pat miratuar Rezolutën 1244 që autorizoi vendosjen forcës ndërkombëtare ushtarake dhe civile në Kosovë.

E në Kosovën e djegur e të mbushur me varre të të vrarëve nga masakrat dhe ekzekutimet, po ktheheshin qindra mijëra refugjatë të dëbuar dhunshëm nga shtëpitë e tyre.

Tani janë bërë 25 vjet nga lufta e Kosovës, dhe një brez i tërë i lindur pas luftës është rritur. Gjeneratat e reja, duhet të kenë mundësinë e njohjes së të kaluarës sonë, të dëshirës për të jetuar në liri dhe të dashurisë së pareshtur për Kosovën, në kohërat më të vështira e në kushtet më të rrezikshme.

Kjo ekspozitë njëmend na kthen pas, në muajt e parë të lirisë dhe sjellë në pah një periudhë historike të rëndësishme për të gjithë neve. Na e sjellë kontrastit ndërmjet çnjerëzores së një regjimi dhe bukurisë së hirshme të njerëzimit.

Krahas mbajtjes gjallë të kujtimeve, është edhe informuese dhe frymëzuese për brezat e rinj.

Në veçanti në këtë ekspozitë mund të shihni jetën e rëndomtë të njerëzve në situata të ndryshme të cilat njerëzorja i bën të njëjta. Pra, do të mund të shihni jo ngjarjet e jetës që e bëjnë jetën ngjarje të mirë dhe ky fotodokumentim unik nga fotografi e gazetari Nick Sidle, është një testament për guximin dhe sakrificat e atyre që kanë kontribuar për paqe në vendin tonë.

Është  një mundësi për të reflektuar mbi rëndësinë e bashkëpunimit ndërkombëtar dhe kontributin e çmuar  të KFOR-it në substancë të së cilës ishte NATO-ja.

Ne po shikojmë prapa në kohë që të ecim më sigurt dhe më shpejtë në të ardhmen evropiane e paqësore, demokratike e prosperuese.

Në këtë periudhe të shënuar me rreziqe të konsiderueshme për sigurinë evropiane dhe globale, ne e vlerësojmë thellësisht rolin thelbësor të NATO-s dhe mbështetjen e dhënë për Kosovën dhe sigurinë tonë. Me synim të qartë dhe përkushtim të pa rezervë për rrugën euroatlantike, falënderojmë çdo vend anëtar të NATO-s, asokohe ishin 19-të sot janë 32  për rolin dhe kontributin për vendin tonë.

Falënderimet më të përzemërta për të gjithë ata që kanë kontribuar në këtë ekspozitë. Mirënjohje e përjetshme për të gjithë paqeruajtësit që kanë shërbyer e shërbejnë në Kosovë. Kontributi juaj është i pamatshëm dhe i paharrueshëm.

NË FOKUS

image-78
Ndahet nga jeta gazetari dhe aktori kosovar
LAJMI-I-FUNDIT
Pamje shokuese teksa një burrë e rrah brutalisht një grua në Prizren
mirlind
Federata e Maqedonisë së Veriut reagon ndaj Mirlind Dakut: Kërko falje publike
cikloni
Cikloni në Itali, stuhitë afrohen në Ballkan dhe pastaj edhe në Kosovë
mjek-730x440-1-600x360-1
Vdes mjeku i njohur
komisiojii
​“Në villën e Radojiçiqit keni pi raki”/ “O zemlak, shefin ta kanë gjete në kipek me BIA-në” – Eskalon debati në Komision
5756utyty-1
E bëri shqiponjën para serbëve, UEFA e përjashton gazetarin kosovar
bes
Mes spekulimeve për ndarje, Bes Kallaku bën postimin që emocionoi të gjithë