Gjykata Kushtetuese ka publikuar aktgjykimin e plotë lidhur me kërkesat KO256/26 dhe KO258/26, përmes të cilit konstatoi se Kuvendi i Kosovës është konstituuar pas kalimit të afatit 30-ditor të përcaktuar me Kushtetutë, por kjo nuk e bën të pavlefshme zgjedhjen e Qeverisë.

Në aktgjykimin për rastet KO256/26 dhe KO258/26, Gjykata vendosi njëzëri për çështjet që prekën Kuvendin, Qeverinë dhe zgjedhjen e Presidentit.

Pika me pasojën më të drejtpërdrejtë është Presidenca: afati 60-ditor ka filluar më 8 gusht dhe përfundon më 6 tetor

Nëse Kuvendi nuk zgjedh Presidentin deri atëherë, ai shpërndahet sipas Kushtetutës dhe zgjedhjet e parakohshme duhet të mbahen brenda 45 ditësh.

Sipas Gjykatës, në rastin konkret, afati për konstituimin e Kuvendit ka përfunduar më 7 gusht 2026. Për pasojë, Gjykata vlerëson se nga 8 gushti ka nisur të rrjedhë afati kushtetues për zgjedhjen e Presidentit të Republikës së Kosovës.

Gjykata i është referuar edhe nenit 82 të Kushtetutës, i cili përcakton se Kuvendi shpërndahet nëse brenda 60 ditësh nga fillimi i procedurës së zgjedhjes nuk zgjidhet Presidenti. Në këtë rast, Gjykata ka përcaktuar se afati 60-ditor për zgjedhjen e Presidentit përfundon më 6 tetor 2026.
“Gjykata konsideron që Kuvendi deri më 6 tetor 2026 duhet zhvilluar dhe përfunduar procedura për zgjedhjen e Presidentit”, thuhet në aktgjykim.

Në arsyetim, Gjykata thekson se deputetët duhet ta shfrytëzojnë këtë periudhë për të përmbushur obligimin kushtetues për zgjedhjen e Presidentit të Republikës.

Gjykata ka sqaruar gjithashtu pasojën në rast se Presidenti nuk zgjidhet deri më 6 tetor. Sipas aktgjykimit, në një situatë të tillë Kuvendi shpërndahet ex constitutione dhe zgjedhjet e parakohshme për Kuvend duhet të zhvillohen brenda 45 ditësh nga dita e shpërndarjes.

Sa i përket zgjedhjes së Qeverisë më 13 shtator, Gjykata ka shqyrtuar pretendimin se ajo ishte zgjedhur nga një legjislaturë që nuk e kishte përfunduar konstituimin brenda afatit kushtetues. Gjykata e ka lidhur këtë çështje me konstatimin e saj se Kuvendi ishte konstituuar pas kalimit të afatit 30-ditor.

Në pjesën përfundimtare të aktgjykimit, Gjykata Kushtetuese ka vendosur njëzëri që kërkesa të deklarohet e pranueshme dhe ka konstatuar se Kuvendi i Kosovës është konstituuar pas kalimit të afatit 30-ditor të përcaktuar me Kushtetutë.