Ligji për Vlerat e Luftës Çlirimtare të Kosovës do të procedohet javën e ardhshme për miratim në qeveri, tha të premten në seancën e Kuvendit, ministri për Punë, Familje dhe Vlerat e Luftës Çlirimtare, Andin Hoti.

Ai tha se janë duke hartuar koncept-dokumentin për këtë ligj dhe shumë shpejt do të finalizohet.

“Ligji për vlerat e luftës çlirimtare të Kosovës veçse ka filluar në ministrinë time. Për shkak të procedurave se si fillon një ligj, ne jemi duke hartuar koncept-dokumentin për ligjin që i përfshin të gjitha ato që ka me përmbajtë ligji. Ai besoj që është pranë finalizimit dhe besoj që javën tjetër do të jetë në mbledhje të Qeverisë së Kosovës për aprovim dhe pastaj do të fillojmë me procedura të tjera”, tha ai.

E OVL UÇK ka kërkuar që Ligji të pasqyrojë të gjitha kërkesat e tyre.

“Ky hap ka rëndësi, por nuk mjafton. Procesi duhet të ofrojë përmbajtje, jo simbolikë. Në formën e tij përfundimtare, teksti duhet të pasqyrojë plotësisht kërkesat tona të deklaruara, të mbrojë vlerat e Luftës Çlirimtare dhe të garantojë njohje të dinjitetshme për çdo kategori pjesëmarrëse. Çdo përpjekje për t’i zbehur këto parime do të ishte e papranueshme, e padenjë për sakrificën mbi të cilën u ndërtuan liria dhe shtetësia e Kosovës”, u tha në reagimin e kësaj organizate.

Tutje theksohet se OVL-UÇK do ta ndjekë këtë proces me vigjilencë të plotë deri në miratimin përfundimtar në Kuvend.

“Qëndrimi ynë është i prerë: Ajo që u fitua përmes sakrificës nuk mund të zbehet, të shtyhet apo të kthehet në material për pazare politike”.

“Vlerat e UÇK-së nuk janë çështje komoditeti. Ato janë detyrim i përhershëm institucional, një borxh ndaj çdo luftëtari që iu përgjigj thirrjes kur Kosova përballej me orën e saj vendimtare. Ky borxh nuk vjetërsohet, As vendosmëria jonë për ta mbrojtur atë, pa tërheqje dhe pa kompromis”, përfundoi reagimi i OVL-UÇK. ///