Kryeministrja e Danimarkës, Mette Frederiksen, është përballur me një koment të pazakontë në Instagram, pasi një kirurg plastik i sugjeroi të ndërhynte në hundën e saj.

Pas kthimit nga një udhëtim i shkurtër në Ukrainë, Frederiksen vendosi të lexonte disa prej mesazheve që kishte marrë në rrjetet sociale. Mes tyre ishte edhe një mesazh nga një kirurg plastik, i cili pasi kishte parë fotografitë e saj, i shkroi se mund t’i “korrigjonte atë pjesën e vogël” në hundë.

Përgjigjja e kryeministres daneze ishte e drejtpërdrejtë: “Jam e kënaqur me trupin tim, sinqerisht, nuk kam nevojë për mendimin e një burri kirurg plastik”, i shkroi ajo.

Sipas raportimeve të mediave britanike, kjo nuk është hera e parë që Frederiksen merr komente të padëshiruara për pamjen e jashtme. Në rrjetet sociale, ajo është përballur ndër vite me mesazhe që kritikojnë dhëmbët, flokët apo hundën e saj dhe që i sugjerojnë trajtime estetike, Botox apo ndërhyrje kirurgjikale.

Por kryeministrja 48-vjeçare duket se nuk është e gatshme t’i nënshtrohet presionit për të ndryshuar pamjen e saj. Përkundrazi, ajo i përdor këto mesazhe si shembull të presionit që gratë përballojnë për t’iu përshtatur standardeve të caktuara të bukurisë.

Frederiksen ka deklaruar publikisht se ndihet mirë me trupin e saj dhe nuk e sheh moshën apo ndryshimet natyrore të pamjes si diçka që duhet patjetër të korrigjohet.