Opozita në Kosovë nuk e mbështet formimin e grupit punues për themelimin e Byrosë Shtetërore për Konfiskimin e Pasurisë, raporton Gazeta10.

Deputeti nga rradhët e Partisë Demokratike të Kosovës, Hajdar Beqa, ka thënë se PDK nuk merr pjesë në grupin punues sepse ky projektligj është në kundërshtim me Kushtetutën e Kosovës.

“Ne si PDK duke i parë rekomandimet e Komisionit të Venecias mendojmë se ky projektligj është në kundërshtim me Kushtetutën përveç qëllimit, nuk do të marrim pjesë në grupin punues. Kërkojmë të krijohet një konsensus me subjektet ta rikthejmë, ta bëjmë një ligj të zbatueshëm”,ka thënë Beqa.

Ndërsa deputeti nga rradhët e Lidhjes Demokratike të Kosovës, Driton Selmanaj, ka thënë se sipas tij Komisioni i Venecias nuk e aprovon këtë projektligj.

“Sipas leximit tim Komisioni i Venecias nuk e aprovon këtë projektligj. Kam bindjen time se me formën se si e ka propozuar qeveria këtë projektligj është i papërmirësueshëm, duhet pos ta rishkruajnë nga fillimi”,ka thënë Selmanaj. / Gazeta10