Policia e Kosovës, në bashkëpunim me Doganën e Kosovës, ka zhvilluar një operacion për zbatimin e masave dhe luftimin e aktiviteteve të paligjshme dhe kontrabandës. Gjatë këtij operacioni, janë intensifikuar kontrollet taktike dhe operacionale në terren.

Gjatë operacionit të Policisë së Kosovës më datën 11.09.2023, janë zbuluar dhe parandaluar dy raste të kontrabandës me mallra.

“Rasti 1:Pas pranimit të informacioneve për lëvizje të dyshimtë në brezin kufitar Serbi-Kosovë, njësiti Task Forcë ka ndërmarrë masa të nevojshme operativo-taktike. Në zonën e Kamenicës, është ndaluar automjeti Mercedes furgon me targa vendore, i cili është vërejtur duke hyrë ilegalisht në Republikën e Kosovës. Drejtuesi i automjetit ishte R. M., një mashkull kosovar. Gjatë kontrollit të automjetit të tij, i dyshuari kishte të ngarkuara mallra që dyshohet se janë të kontrabanduara.Rasti 2: Në rrugën Stublinē – Dobërqan, një automjet me targa serbe, i cili dyshohet se kishte hyrë në mënyrë ilegale në Republikën e Kosovës, ka tentuar të shmangte kontrollin e njësisë Task Forcë. Po ashtu, ai ka refuzuar të bindet urdhrave të Policisë, duke kërcënuar zyrtarët policorë. Gjatë vozitjes, automjeti ka humbur kontrollin dhe ka dalë nga rruga. Gjatë kontrollit të automjetit është vërejtur se i dyshuari me iniciale F. M., një mashkull shtetas i Serbisë, kishte të ngarkuara pajisje të ndryshme të kontrabanduara, me një vlerë përafërt rreth 20.000 euro. Në lidhje me këto raste, të gjitha veprimet janë ndërmarrë në bashkëpunim me Prokurorinë e Shtetit, dhe malli është dërguar në terminalin doganor për procedurat e mëtutjeshme që janë parashikuar për rastet e tilla”, thuhet në njoftimin e Policisë.