Kur kanë kaluar gjashtë xhiro të sezonit 2024/25 në Superligën e Kosovës, është vetëm një skuadër që deri më tani nuk njeh humbje.

Kjo skuadër është Suhareka, klubi i promovuar këtë edicion në elitën e futbollit kosovar.

I themeluar vetëm dy vite më parë, klubi nga Theranda ka qenë shembull i organizimit në Kosovë.

Para fillimit të kampionatit, Suhareka angazhoi si shef të shtabit tenik trajnerin e mirënjohur shqiptar, Shpëtim Duron.

Deri më tani nën drejtimin e Duros, Suhareka ka arritur katër fitore dhe një barazim.

Barazimi erdhi në xhiron e parë të kampionatit, ku në stadiumin “Fadil Vokrri” barazoi pa gola me Prishtinën.

Fitoja e parë në Superligë për Suharekën erdhi para adhuruesve të vet, në përballjen kundër Dukagjinit.

Kjo sfidë përfundoi me shifrat 3-1.

Në shtëpi Suhareka arriti edhe fitoren tjetër, kësaj radhe kundër Gjilanit me rezultat 3-2.

Ferizaj dhe Feronikeli ’74 ishin kundërshtarët e radhës që u mposhtën nga skuadra e Shpëtim Duros që është lider në Superligë me një ndeshje më pak të zhvilluar.

Në xhiron e ardhshme, Suhareka do të luajë kundër Llapit të Tahir Batatinës në stadiumin “Zahir Pajaziti” në Podujevë.